"ILANG TULOG NA LANG"

"Ilang tulog na lang!" (ang bukambibig ng batang may hinihintay)... "Ilang tulog na lang..."

Ilan sa inyo ang nagsasabi rin ng ganito kapag ang inyong hinihintay ay papalapit na ng papalapit...

Aaminin ko 'nung bata ako ay sinasabi ko rin ito at kung minsan nga hanggang ngayon ay nasasabi ko pa rin ito.

Masaya hindi ba ang pakiramdam na papalapit na ng papalapit ang iyong hinihintay? Ilang tulog na nga lang ay haharapin na ninyo ng may pagmamalaki at may karangalan ang Araw ng Pagtatapos.

Parang kailan lang

ang tatlong taon sa pre-school + tatlong taon sa primary + apat na taon sa middle school + apat na taon sa high school plus

ilang tulog na lang...

Nawa'y sa inyong lahat na nananabik na sa pinakahinihintay na araw ng inyong pagtatapos ay silangan kayo ng panibagong sigla sa inyong mga puso at isipan sa araw na iyon at sa araw-araw pagkatapos ng masayang araw na iyon. Uhawin pa ninyong patuloy ang inyong mga sarili sa edukasyon' isang pagkauhaw na lalong humahangad sa karunungang magdadala sa inyo sa mas matatayog na pangarap na magaganap sa pagsisimula ng buhay ninyo sa kolehiyo - ang bagong tahanan ninyo.

P.S...Ito'y munting pakiusap na kung inyong tugunan ay maraming salamat

> Na huwag sanang kalilimutan ang mabubuting aral na inyong kinamulatan at natutunan sa ating paaralan.

> Na kahit na may mga naging pagkukulang ay matutunan ninyong punan ang kaniyang mga naging kakulangan

> Na iukit sa inyong puso't matalinong isipan na kailanman saan man at anuman ang inyong maging kapalaran - -

na ang paaralang minsang inyong tinahanan ay itinuturing kayong mahalagang kayamanan magpakailanman...

SA INYONG LAHAT...

ILANG TULOG NA LANG! ILANG TULOG NA LANG!!!

___________________________________
"ILANG TULOG NA LANG"
para sa seniors 2008 ng International Christian Academy
nalikha: Marso 13, '08 / 12:28ng umaga